PASASALAMAT

(I)-ISANG PASASALAMAT

Libolibong dahilan itong nalalaman

Upang kadakilaan Mo'y aking ipagsigawan

Paanong tatahimik nalang kung pilit umaalpas

Ang damdaming uhaw na uhaw sa pag-ibig Mong wagas.

Sa Iyo ang kapurihan!

Sa Iyo ang kaluwalhatian!

Ang pagsambang walang humpay

Marapat lamang sa Iyong pangalan.

Bagaman walang maipagmamalaking anuman

Nilikhang mailap sa magulong kasiyahan

Ang pagsama Mo ay sapat nang katunayan

Ng di matutumbasang kaligayahan at kayamanan.

Puso'y di magawang magsawalang kibo

Sikilin ma'y nag-aalimpuyo

Di ipagpapaliban ang nauukol sa Iyo

Ganyan Mo hinubog ang aming puso.

Dalwang libo't labing apat ang dahilan

Ng kaligayahang di na mapigilan

Isandaang bunga ng kadakilaan

Kaningningang tanging Ikaw ang pinagmulan.

08-25-11 @ Bago Bantay

-seal 8-27-11 11:51

........................................................................................................ 

(II)-ISANG PASASALAMAT

Sa paghakbang kong makalawa

Muling nagsiklab ang pagnanasa

Upang pasalamatang walang hangga

Siya na di nagkait ng awa.

Sa patuloy na pagtindig

Ipinauunawa Niya ang pag-ibig

Sa kanilang bawat titig

Paglingap Niya ang nais marinig.

Patuloy Niyang ipinauunawa

Angking galing ay walang halaga

Upang makiisa sa damdamin nila

Ibihis ang bagay na pinakadakila.

Hindi batayan ang anumang dunong

Hanaping lagi ang Kaniyang habag

Sabihin mo mang puspos ka na

Pag iniwan ka'y anong magagawa?

Sa patuloy kong paghakbang

Habang nadaragdagan ang tapang

Nawa'y hawakan Niyang aking kamay

Pigilan Niyang aking dila

Huwag maglayag ang isipan

Hubugin ang puso sa kababaan

At muling dalhin sa unang kalagayan.

 09-01-11 @ Polo

 -seal 09-1-11 11:13

.......................................................................................................

(III)-ISANG PASASALAMAT

Sa paghakbang kong ikatlo ibinuhos Mong lubha

Di nagmamaliw na habag sa Iyong lingkod na aba

Sa higpit ng Iyong hawak paanong madudupilas

Di man sanay sa pagtindig tiwala naman sa Iyong bisig.

Silang nauuhaw sa Iyong paglingap at hanap Kang masikap

Pinili ang kababaang loob upang maramdaman Kang ganap

Silang nagagalak sa pagsunod kaakibat man ang pagsubok

Sa kanila ka sumasama at kaalakbay sa tuwi-tuwina.

Sa patuloy pang paghakbang huwag na huwag Mong iiwan

Huwag at di kailanman magtiwala sa sariling karunungan

Mabuti pang panatagin sa pagsunod at simpleng kalagayan

Kaysa itulad sa haring marunong at ang wakas ay kapahamakan.

Mamukadkad nawa ang pinasibol Mong damdamin

Upang patuloy na maramdaman ang hinaing nila't hibik

Turuan mong unawain ang bawat luha nila't galak

Upang sa gayo'y mabuklod kami sa pag-ibig Mong wagas.

(Thanking Him for guiding me throughout the tests)

09-10-11 @ Pag-asa

seal 09-12-11 15:23