Kanugnog ng mahahaba at kongkretong daan,
sa maiingay na sasakyan pati gusaling nagtataasan,
mga pamilihang abala sa pakikipagkalakalan,
sari-saring balita at usapang tila makabuluhan,
ay naroon ang Nayon.
Ilang oras na biyahe lamang ramdam mo na,
na ikaw ay nasa Nayong tunay na pinagmulan.
Sa alikabok at makipot na daang tiyak ang hantungan.
Sa kaway ng mga magsasaka, mga palay ay nagsasaya.
Sa Nayon, ang pamamasyal anong ganda.
Bawat araw doon ay maaga ang pagsisimula
Di mawaring ligaya ay hatid sa bawat higop
ng kapeng dinikdik sa gilingang bato ni lola.
Ang samyo ng aroma nito'y nagpapainit sa paligid
At sa usok ng isdang daing sa amoy palang
ikaw'y tinatakam na.Sabayan pa ng lamig
ng madaling araw at inuming tubig sa balon nagmula.
Bago pa magtanghaling tapat, sa lilim ng punong bayabas
Sa malamuyot na hanging amihan,si pipit
sa sanga ay umaawit, paroo't-parito sa pagkandirit.
Maya-maya lang, handa na ang tinola, malinamnam
ang sabaw nitong sinangkapan ng manamis-namis na papaya.
Kagaya'y bubuyog na nakatagpo ng sunflower na hangad
Di titigil sa paglibot hanggang sa siya ay mabusog.
Sa paglibot sa nayon sumasariwa ang lahat.
Sa lagaslas ng batisan, musika ng katahimikan.
Mga tutubi sa waterlily, hatid ay kalayaan.
Gayundin ang malawak na kabukiran,simple lang
ngunit sa kanya nagmumula halos lahat ng yaman.
Kay inam simsimin ang halimuyak ng parang,pansamantala
pinatitigil tayo, para halimuyak niya'y maipagyabang.
Di malilimutan ang gabi sa nayon, nakakakilabot
ang dami ng mga bituing di mabilang,sa tanglaw
ng maliwanag na buwan at huni ng mga ibong
kung saan nagmula ay hindi alam. Sa kokak
ng mga palaka at paghehele ng mga kuliglig,
ay mahimbing ang tulog sa Nayon.
Masarap mamasyal sa Nayon.
-Noel Manzano 01-20-11 15:10
